طريقة عمل القرص الطرية

IMG_20160318_133754

القرص الطرية الفلاحى كنت باكلها كتير عند خالتو بس عمرى ما جربت اعملها أو اسالها على الطريقة بس لاقيت ناس طلبتها مني فسألتها عليها وقالتلى مقاديرها أنا بس استعملت بدل الرايب لبن وضفت بيكنج بودر وحبة البركة والزيت والحمدلله طلعت حلوة اوى طرية وبتدوب فى بؤك
المقادير:
4كوب دقيق
كوب سمنة سايحة
ربع كوب زيت
3\4 كوب لبن
معلقة كبيرة خميرة فورية
معلقتين كبيرة سكر
معلقة كبيرة بيكنج بودر
نصف معلقة صغيرة ملح
معلقة كبيرة حبة البركة

الطريقة :ندوب الخميرة مع معلقة سكر ومعلقتين كبيرة ميه تكون دافية وتغطى وتترك 10 دقايق
هانخلط الدقيق مع البيكنج بودر والملح والسمنة والزيت ونقلبهم ثم نضيف خليط الخميرة ونزود اللبن مع العجن كويس لغاية ماتلاقيها بقت طرية وناعمة ونتركها ربع ساعة
ثم نقسمها لكور صغيرة لو مش هانحشيها او كبيرة شوية لو هانحشيها(طبعا ممكن تحشيها تمر او جبنة)
ونرصها فى صينية مدهونة ونضغط عليها نفردها شوية ممكن تدهنيها زيت أو لبن وترشى سمسم مع سكر اللى يعجبك وتترك تخمر تقريبا 30 دقيقة وبعدين تدخل فرن يكون سخن على 180 تقريبا بتاخد تلت ساعة غاية مالونها يبقى دهبى
وبالف هنا

IMG_20160318_134315